Skógræktarstöðin Barri h.f. var stofnuð haustið 1990 og hóf ræktun á skógarplöntum, í sérhæfðri gróðrarstöð, vorið 1991. Barri hefur síðan þá verið einn stærsti framleiðandi skógarplantna á Íslandi. Helstu viðskiptavinir í dag eru Héraðs- og Austurlandsskógar, Norðurlandsskógar Landgræðsluskógar og Suðurlandsskógar en auk þess hafa verið framleiddar plöntur fyrir önnur stór skógræktarverkefni. Barri framleiðir einnig plöntur fyrir almennan markað.

Í dag er framleiðslan á 3 stöðum, þ.e. Kaupvangi 19 Egilsstöðum, á Hallormsstað og á Tumastöðum í Fljótshlíð. Aðstaðan á Hallormsstað er leigð af Skógrækt ríkisins á Hallormsstað. Aðstaðan á Tumastöðum er leigð af Skógrækt ríkisins á Suðurlandi.

Á þessu ári er verið að flytja fyrirtækið frá Egilsstöðum í Valgerðarstaði við Fellabæ. Þar verða reist tvö 2000 fermetra gróðurhús, frysti- og kæligeymsla fyrir allt að þrjár milljónir plantna auk húss sem hýsir starfsmannaaðstöðu, skrifstofu, sáningar- og pökkunaraðstöðu.